Berkarar döwletiň täze eýýamynyň Galkynyşy döwründe türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň halkara başlangyçlaryny mynasyp dowam etdirýän Arkadagly Gahryman Serdarymyz ulag ulgamynda köptaraplaýyn hyzmatdaşlygyň ösdürilmegine, üstaşyr ulag geçelgeleriniň durnukly ulgamynyň pugtalandyrylmagyna, dünýäde syýasy-ykdysady durnuklylygy saklamaga, ulag diplomatiýasynyň mümkinçiliklerini durmuşa geçirmek ugrunda dost-doganlyk gatnaşyklaryny ösdürmäge uly üns berýär. Ýurdumyzyň deňiz we derýa ulaglary hem milli ykdysadyýetimiziň esaslaryny emele getirýän ulgamdyr. Türkmenbaşy Halkara deňiz porty Ýewropadan Aziýa, Aziýadan Ýewropa ýük daşalýan ýollaryň çatrygynda ýerleşip, Merkezi Aziýanyň «deňiz derwezesi» bolup durýandygy üçin, sebitde iň bir amatly logistika merkezleriniň biri hökmünde ösýär we kämilleşýär. Onuň Halkara Portlar Assosiasiýasyna goşulmagy bilen, edilýän hyzmatlary halkara standartlara laýyklykda amala aşyrmak, dünýäniň ösen portlarynyň tejribesini öwrenmek we ulanmak boýunça alnyp barylýan işler dowam etdirilýär. Şu maksat bilen halkara maslahatlara, sergilere, ikitaraplaýyn gepleşiklere, göni wideoaragatnaşyk arkaly duşuşyklara işjeň orun berilýär.
Hazaryň türkmen kenarynda ýerleşýän «Balkan» gämi gurluşyk we abatlaýyş zawody» paýdarlar jemgyýetinde deňiz portunyň we söwda flotunyň dürli görnüşli, deňizde ýüzýän gämilerinde gysga wagtyň içinde düýpli, orta we ýeňil abatlaýyş işleri ýokary derejede alnyp barylýar. Hormatly Prezidentimiziň «Balkan» gämi gurluşyk we abatlaýyş zawody» paýdarlar jemgyýetine Koreya Respublikasynyň «Komea» deňiz enjamlaryny öwreniş assosiýasiýasy bilen bilelikde gämi gurluşygynyň başlanmagyna ygtyýar bermegi zawodyň gämi gurluşykçylaryny has-da begendirdi, buýsandyrdy. «Ýük göterijiligi 6100 tonna bolan iki sany gury ýük gämileriniň gurluşygyny taslamalaşdyrmak we tehniki hünärmenler bilen üpjün etmek barada» we «Ýük göterijiligi 6100 tonna bolan iki sany gury ýük gämileriniň gurluşygy üçin enjamlar we materiallar bilen üpjün etmek barada» gol çekilen şertnamalaryň esasynda, «Balkan» gämi gurluşyk we abatlaýyş zawody» paýdarlar jemgyýetinde ilkinji gezek täze gämiler gurlar.
