Ähli ugurlar boýunça gülläp ösýän, raýatlary bagtyýar durmuşda ýaşaýan, dünýäde abadançylygyň rowaçlanmagy ugrunda uly tagallalary edýän berkarar döwletimizde gazanylýan üstünlikler ata-babalarymyzyň arzyly arzuwlarynyň hasyl bolandygyny äşgär edýär. Türkmen halkynyň Milli Lideri Gahryman Arkadagymyzyň asylly ýoluny, döwletli ýörelgelerini has-da rowaçlandyrýan Arkadagly Gahryman Serdarymyzyň parasatly baştutanlygynda Garaşsyz, hemişelik Bitarap Türkmenistan bu günki gün taryhy ösüşleri nazarlaýar. Şeýle ajaýyp hakykata «Pähim-paýhas ummany Magtymguly Pyragy» ýylynyň şanly wakalarynyň mysalynda has hem aýdyň göz ýetirýäris.
Halkymyzyň bagtyýarlygynyň nyşany bolan mukaddes Garaşsyzlygymyzyň 33 ýyllyk baýramynyň öňüsyrasynda — 24-nji sentýabrda geçirilen Türkmenistanyň Halk Maslahatynyň taryhy ähmiýetli mejlisinde ähli ulgamlarda gazanylan üstünliklere baha berlip, belent maksatlara ýetmek üçin täze wezipeleriň kesgitlenilmegi il-ulsumyzy has-da jebisleşdirip, ýurt binamyzyň binýadyny berkitdi. Merdana pederlerimiziň döwleti we jemgyýeti dolandyrmakda toplan baý tejribesine esaslanyp, Esasy Kanunymyzda halk häkimiýetliliginiň ýokary wekilçilikli edarasy hökmünde ykrar edilen Türkmenistanyň Halk Maslahaty döwlet häkimiýetiniň ýeke-täk gözbaşy hasaplanýan halkyň öz häkimiýetini amala aşyrmaga bolan konstitusion hukuklarynyň ýurdumyzda nusgalyk derejede üpjün edilýändigini ýene bir ýola aýdyň tassyklady.
