Düýn — 4-nji noýabrda paýtagtymyzdaky Jemgyýetçilik guramalarynyň merkezinde Türkmenistanyň Agrar partiýasynyň IV gurultaýy geçirildi. Gurultaýa ýurdumyzyň ähli sebitlerinden partiýanyň köp sanly agzalary, şeýle hem ministrlikleriň we pudaklaýyn dolandyryş edaralarynyň, jemgyýetçilik guramalarynyň, köpçülikleýin habar beriş serişdeleriniň wekilleri gatnaşdy.
Jemgyýetçilik guramalarynyň merkezi binasynyň eýwanynda ýurdumyzyň oba hojalyk toplumyndaky üstünlikleri şöhlelendirýän haly önümleriniň, amaly-haşam sungatynyň eserleriniň, dokma senagatynyň harytlarynyň sergisi guraldy. Bu ýerde bagşy-sazandalar topary joşgunly aýdym-sazlary ýerine ýetirdi.
