Ýokary derejedäki halkara forumlaryň yzygiderli geçirilýän ýerine öwrülen paýtagtymyzdaky Söwda-senagat edarasynyň binasynda 23 — 25-nji oktýabr aralygynda «Türkmenistanyň nebiti we gazy — 2024» atly XXIX halkara maslahat we sergi ýaýbaňlandyryldy. Bu ýerde dürli dillerde özara pikir alyşýan işewürleriň söhbetleri ýurdumyzyň nebitgaz toplumyndaky mümkinçilikleriniň dünýäde uly gyzyklanma döredýändigini tassyklasa, sergi diwarlyklarynyň özboluşlylygy pudaga innowasion tehnologiýalary ornaşdyrmaga ymtylyşy görkezdi.
Hökümet agzalarynyň, pudaklaýyn dolandyryş edaralarynyň, abraýly halkara guramalaryň we daşary döwletleriň ýurdumyzdaky diplomatik wekilhanalarynyň ýolbaşçylarynyň, nebitgaz senagatyndaky öňdebaryjy kompaniýalaryň, jemgyýetçilik guramalarynyň, köpçülikleýin habar beriş serişdeleriniň wekilleriniň gatnaşmagynda geçirilen açylyş dabarasynda hormatly Prezidentimiziň foruma gatnaşyjylara iberen Gutlagy okaldy. Gutlagda her ýyl geçirilýän «Türkmenistanyň nebiti we gazy» atly halkara maslahatyň we serginiň ýurdumyzyň ýangyç-energetika toplumyny ösdürmegiň ileri tutulýan ugurlary, özara bähbitli hyzmatdaşlygy işjeňleşdirmegiň ýollary, nebitgaz pudagyna täze tehnologiýalary ornaşdyrmagyň, önümçiligi döwrebaplaşdyrmagyň häzirki zaman usullary barada pikir alyşmaga ýardam berýändigi bellenildi.
