Türkmenistanyň nebitgaz toplumy milli ykdysadyýetimiziň möhüm pudagy bolup, onuň düzüminde görüm-göreldesi, at-abraýy, nusga alarlyk ýadawsyz zähmeti bilen tapawutlanýan adamlaryň müňlerçesi işleýär we uly hormatdan peýdalanýar. «Türkmengaz» döwlet konserniniň Ylmy-barlag tebigy gaz institutynyň tehniki-ykdysady seljerme bölüminiň bölümçe müdiri Meretdurdy Mämmedow şolaryň biridir. Meretdurdy aga indi ýarym asyrdan gowrak wagt bäri nebitgaz toplumynyň düzümlerinde zähmet çekýär. Adamy zähmet bezeýär. «Işleseň il tanar» diýilmesi hem juda dogrudyr. Halypa gazça egindeşleriniň, ýaşlaryň sylag-sarpasy uly. Ýakynda bolsa, has takygy, mukaddes Garaşsyzlygymyzyň şanly 33 ýyllyk baýramçylygynyň öňüsyrasy M.Mämmedow hormatly Prezidentimiziň Permany esasynda «Gaýrat» medaly bilen sylaglanyldy.
M.Mämmedow 1949-njy ýylda Aşgabat şäherinde dogulýar. Paýtagtymyzdaky 29-njy orta mekdebi onuň bilim-terbiýe alan ojagydyr. Ýaşlykdan okuwa bolan höwes, bilime bolan teşnelik ony deň-duşlarynyň köpüsinden tapawutlandyrypdyr. Orta mekdebi kümüş medal bilen tamamlan zehinli uçurym şol wagtky Türkmen politehniki institutynyň nebitçilik fakultetine okuwa girýär we bu ýokary okuw mekdebiniň nebitgaz ýataklaryny işläp geçmegiň tehnologiýasy hem toplumlaýyn mehanizmleşdirilmegi hünärini 1966-njy ýylda düýpli özleşdirip ele alýar.
