27-nji sentýabrda hormatly Prezidentimiz Serdar Berdimuhamedow ýurdumyzyň Garaşsyzlygynyň 33 ýyllygy mynasybetli geçirilen dabaralara gatnaşmak üçin Döwlet münberine bardy. Bu ýerde Döwlet Baştutanymyzy ýygnananlar uly ruhubelentlik bilen garşylady.
Esasy dabaralar Döwlet münberiniň öňündäki meýdançada ýaýbaňlandyryldy. Bu ýere Mejlisiň Başlygy, Hökümet agzalary, Halk Maslahatynyň agzalary, harby we hukuk goraýjy edaralaryň, ministrlikleriň we pudaklaýyn dolandyryş edaralarynyň, jemgyýetçilik guramalarynyň ýolbaşçylary, şeýle hem Aşgabat, Arkadag şäherleriniň we welaýatlaryň häkimleri, ýurdumyzda işleýän diplomatik wekilhanalaryň ýolbaşçylary, baýramçylyk mynasybetli paýtagtymyza gelen daşary ýurt wekiliýetleriniň agzalary bardy.
