Bahar bagdan başlanýar
Niräňe seretseň, güllän baglara gözüň düşýär. Häzirem olaryň ak gülleriniň nurly şöhlesi al-asmandaky Günüň şuglasy bilen sazlaşyp, täsin bir dünýäni emele getirýär. Baglaryň baharyň ilkinji buşlukçysydygyny bilmeýänimiz ýokdur. Göreniňde göwünleri ýakymly ýylgyryşa besleýän güllän erik agajynyň deňinden biparh geçip bilmersiňiz. Bahar, bag bilen bagly şeýle oýlanmalar paýtagtymyzyň Köpetdag etrabynyň Bag müdirliginiň Berzeňňi şitilhanasyna barýan wagtymyz hem ýakymly hemramyz boldy. Bu ýere gelenimizde, bag ekmek işleriniň örän gyzgalaňly barýandygyna şaýat bolduk. Her ýyl 250 müň sany daragty ýetişdirip, paýtagtymyzy gül-gülüstanlyga öwürmäge goşant goşmak uly sogaply iş ahyry! Tuýa, sosna, kiparis, dub, klýon, erik, badam, igde ýaly agaçlar bilen birlikde, dürli hili güller-de bar. Şitilhanadaky nahallar çybyk görnüşinde hem, tohumyndan hem ýetişdirilýär. Munuň üçin daragtyň tohumy 10 günläp ýörite taýýarlanylan (erginli) suwda saklanyp, soň ekilýär. Şeýdip, ekilen agaçlar 35 günde gögerip, çykyp başlaýar. Iki ýyl geçenden soň, şitil joýa geçirilýär. 22-nji fewraldan joýa geçirilýän şitiller gowy özüni tutýança, bu ýerde-de 3 ýyl saklanýar. Şeýlelikde, 5 ýylda ýetişdirilen bag nahallary paýtagtyň çar künjüne iberilýär. Ýurdumyzda her ýylda geçirilýän ählihalk bag ekişliginde bu nahallaryň müňlerçe düýbi oturdylýar.