Türkmen topragynda nebit barada ilkinji ýatlamalar gözbaşyny baryp XIII asyrdan alyp gaýdýar. Şol döwürde Nebitdagda bu çig mal guýy gazmak arkaly çykarylypdyr. 1782-nji ýylda Çelekende (halk arasynda «nebitli ada» diýlip atlandyrylypdyr) nebit guýularynyň 20-si işläp, olardan bir ýylda 4 müň puda çenli nebit çykarylypdyr — meşiklere (malyň derisinden ýasalan halta) guýlup, gaýyklar bilen daşalypdyr.
1876-njy ýylda Nobel doganlaryň şereketi Çeleken adasynda guýy gazdyrýar hem-de nebitli ýataklary işläp taýýarlaýar, 1882-nji ýylda bolsa, 38 sany ýer bölegi bolup, olaryň 8-si Nobele degişli bolupdyr (guýularyň 3-si burawlanyp, 164 guýy kärendesine alnypdyr), ýer bölekleriniň 30-syna nebit senagatçysy Palaşkowskiý eýe çykypdyr.
