Türkmenistanyň Kärdeşler arkalaşyklarynyň Ahal welaýat birleşmesiniň hem-de welaýat Baş bilim müdirliginiň bilelikde guramagynda Kaka etrabynyň Hywaabat jülgesindäki “Ýaşyl ýaýla” çagalar dynç alyş-sagaldyş merkezinde geçirilen dabara Çagalary goramagyň halkara gününiň çäreleriniň üstüni ýetirdi.
“Çaga kalbymyz joşýar bagtyýar zamanada — alkyşymyz çäksizdir Arkadagly Gahryman Serdara!” atly baýramçylyk dabarasyna gatnaşmaga welaýatymyzyň gündogar sebit etraplaryndan gelen çagalar şatlykly pursatlara şaýat boldular. Olar özleriniň deň-duşlarynyň ýerine ýetiren aýdym-sazlaryny, labyzly okan goşgularyny diňlediler, joşgunly tans çykyşlaryny synladylar. Hakyky toý keşbinde bezelen sahnadaky çykyşlaryň her birinde beýik döwrümiziň waspy joşgunly ýetirildi.
