Atmosferanyň daşyna syýahaty amala aşyrýan «Blue Origin» kompaniýasynyň soňky syýahatyndaky ýolagçylaryň biri aýratyn hormata mynasyp adamlaryň biridi. 1960-njy ýyllarda NASA-da kosmosa çykmak üçin türgenleşik sapagyny geçen, emma kosmosa çykyp bilmedik Ed Dwaýt 60 ýyldan soňra kosmosa çykdy. 90 ýaşly Dwaýt kosmosa çykmak üçin saýlanyp alnan ilkinji garaýagyz bolupdy.
«Blue Origin» kompaniýasy täjirçilik maksatly kosmos uçuşlaryny amala aşyrýar. «New Shepard» atly gämi arkaly amala aşyrylýan uçuşlarda kosmos gämisi atmosferanyň gutaryp, kosmos giňişliginiň başlan ýerine çenli baryp, gysga wagtlyk Ýeriň dartyş güýji bolmadyk çäginde saklanýar. Soňra bolsa yzyna dolanýar. Dwaýt bu uçuşynyň jadylaýjy täsiriniň bolandygyny belleýär.