Bir gezek ulanylýan plastik bulgurlar gündelik durmuşda ulanylýan önümleriň hataryna goşuldy. ABŞ-nyň kofehana zynjyrlarynyň biri plastik we kagyz bulgurlaryň ýerine has arzan görnüşini ulanyp başlady. Bu bulgurlar tebigata taşlanan ýagdaýynda-da zyýan ýetirmeýär. Sebäbi bu bulgury öndürmek üçin çig mal hökmünde toýun ulanylýar. Şeýle bolansoň, bulgur gysga wagtdan pytrap topraga garyşýar. Maglumatlara görä, her ýylda 500 milliarddan gowrak bir gezek ulanylýan bulgur zibile taşlanýar. Kagyzdan öndürilen bulgurlaryň iç ýüzünde ýuka plastik gatlak bolýar. Şeýle bolansoň, olary çig mal hökmünde gaýtadan ulanmak kyn bolýar. Toýundan öndürilen bulgurlar bolsa daşky gurşawa ýetirilýän zyýany azaltmaga ýardam eder.
Tyllagözel NURYÝEWA,