Angliýanyň çempionatynda «Arsenal» myhmançylykda «Mançester Ýunaýtedi» 1-0 hasabynda ýeňdi. Duşuşykdaky ýeke-täk goly 20-nji minutda Trossar derwezä girizdi. «Mançester Siti» bolsa myhmançylykda «Fulhamyň» derwezesinden 2-sini Gwardiol, jogapsyz 4 gol geçirdi. 34-nji tapgyryň galdyrylan duşuşygynda-da «Mançester Siti» myhmançylykda «Tottenhamy» Erling Holannyň gollary (51, 90+1 p) esasynda ýeňlişe sezewar etdi. Soňky 4 duşuşygynda myhmançylykda «Tottenhamyň» derwezesinden gol hem geçirip bilmedik «Mançester Siti» bu gezek taryhyndaky iň esasy ýeňişleriň birini gazandy. Duşuşygyň 86-njy minutynda londonlylaryň koreýaly ýyldyzy Hin Min Sonuň geçirip bilmedik goly möwsümiň iň aýgytlaýjy pursatlarynyň biri hökmünde taryha girer. Şeýlelikde, «Mançester Sitiniň» 88, «Arsenalyň» 86 utugy bar. «Mançester Sitiniň» yzly-yzyna 4-nji çempionlygyna bir ädim, has takygy, bir ýeňiş galyp, Angliýanyň ýokary ligasynyň taryhynda ilkinji gezek bir klub bassyr 4 sapar çempionlyk gazanyp biler. Elbetde, ýekşenbe gününde öz meýdançasynda «West Hamy» ýeňen ýagdaýynda. Şol bir wagtda başlanjak «Arsenal» – «Ewerton» duşuşygynda-da topçular ýeňiş gazanyp, garşydaşynyň utuk ýitirmegini tama etmeli bolar. Başgaça aýdylanda, dogry futbolda mümkin däl zat ýok, ýöne «Mançester Sitiniň» hem bu elindäki çempionlygyny bererine hem garaşylanok. «Arsenal» bassyr 2-nji möwsümde agza-burna gelen çempionlygy ýitirmegiň bosagasynda dur.
«Tottenhamyň» utulmagyndan soň 4-nji orunda galjakdygy anyk bolan «Aston Willa» topary 41 ýyldan soň UEFA Çempionlar Ligasyna gatnaşar.