Ýakynda etrap medeniýet öýünde Magtymguly Pyragynyň doglan gününiň 300 ýyllygyna bagyşlap, etrap bilim bölüminiň, etrap medeniýet bölüminiň, etrap merkezi kitaphanasynyň, TKA-nyň etrap birleşmesiniň bilelikde guramagynda «Türkmeniň paýhasy sensiň, Pyragy!” atly aýdym-sazly duşuşyk çäresi geçirildi. Oňa bilim, medeniýet işgärleri, kitaphanaçylar, TKA-nyň etrap birleşmesiniň wekilleri hem-de işjeň agzalary gatnaşdylar.
Duşuşykda etrap bilim bölüminiň hünärmeni Annamyrat Hotjyýew, TKA-nyň etrap birleşmesiniň başlygy Gurbanmyrat Muhammetorazow, etrapdaky 4-nji orta mekdebiň mugallymy, şahyr Aýnäzik Esenowa, etrap merkezi kitaphanasynyň kitaphanaçysy Läle Zakirowa, etrapdaky 23-nji orta mekdebiň mugallymy, şahyr Gazanyýaz Hümmedow, etrapdaky 41-nji orta mekdebiň mugallymy Aýjemal Babagulyýewa çykyş etdiler. Olar akyldar şahyrymyz Magtymguly Pyragynyň döredijiligine salgylanyp, beýik ussadyň her bir setirleriniň many-mazmuna baýdygy, nesil terbiýesinde uly ähmiýete eýedigi dogrusynda giňişleýin gürrüň etdiler.
