Köpimiziň iň ýakyn çagalyk dostumyz bolan güjüjekler dürli oýunlary edip, daş-töwerekdäkilere hezil berýärler. Wepaly dostumyzyň uzaga zyňan taýajygymyzy dişläp getirmegi, welosiped sürýän wagtymyz «haw-hawlap» yzymyzdan ylgamagy şatlykly pursatlary döredýär. Kiçijikdigine garamazdan güjügimiziň edermen bolmagyny isläp, Gaplaň, Basar, Aždar, Böwser, Ýolbars ýaly atlary dakýarys. Eýsem, siz aýdanyňa düşünýän, diýleni edýän itiňiziň täsin hereketleri barada gyzyklanyp gördüňizmi?
Itleriň syrly häsiýetlerinden biri bolan kellesini gapdala egmek endigi adamlarda köp ýyllardan bäri gyzyklanma döredýär. Itler, köplenç adamy diňlänlerinde ýa-da daş-töwereginden gelýän sesi eşidenlerinde kellesini bir tarapa gyşardýarlar. It saklaýanlar bu täsin endigiň sebäbine düşünmek isleýärler. Eýsem, itler kellesini näme sebäpden bir gapdala egýärkä?!