Halamaýan endiklerimizi taşlamak we özümizi kämilleşdirmek islesek-de, köplenç öz-özümizi terbiýelemegi yza süýşürýäris. Şeýle hem meýilleşdirýän etsem-petsemlerimizi şu gün etmän, ertire goýýarys. Ertiriň hem bir bahanasy tapylyp, edilmeli işler soňky günlere galýar. Käte dostumyz ýa-da joramyz bilen çaý başynda didarlaşmak üçin wagt belleşýäris, emma oňa-da gijä galýarys. Käte bolsa, öýden çykyp, howlugyp duralga gelýäris, ýöne bu gezek hem awtobusa ýetişmeýäris. Umuman, köplenç halatda endige öwrülip giden gijä galmaklygyň sebäbi näme? Näme üçin etmeli zatlarymyzy yza süýşürip, täze zatlary öwrenmekde, bir işi ýerine ýetirmekde gijä galýarys?
Häzirki döwürde köp adamda gijä galmak dowamly mesele ýaly bolup görünýär. Munuň birnäçe sebäbi bolup, esasan, biologik ýagdaýlar we durmuş endikleri bilen baglanyşdyrylýar. Bilermenler gijä galýan adamlaryň duýgularyny dolandyrmakda we düzgünleşdirmekde dowamly kynçylyk çekýändiklerini aýdýarlar.