Ýurdumyzyň nebitgaz pudagyny ösdürmek, tebigy gazy dünýä bazarlaryna diwersifikasiýa ýoly bilen ibermek, nebitgaz serişdelerini gaýtadan işläp, dünýä standartlaryna laýyk gelýän ýokary hilli önümleri öndürmek Garaşsyz döwletimizde alnyp barylýan energetika strategiýasynyň möhüm ugurlarynyň biridir. Türkmenistanyň nebitgaz pudagynyň eksport kuwwaty ýylsaýyn ýokarlanýar. Daşary ýurtly hyzmatdaşlar bilen özara bähbitli gatnaşyklar pugtalandyrylýar we giňeldilýär.
Şunuň bilen baglylykda, her ýyl daşary ýurtlarda halkara göçme forumlar guralýar. «Pähim-paýhas ummany Magtymguly Pyragy» ýylynda hem şeýle iri halkara forum Fransiýanyň Pariž şäherinde üstünlikli geçirildi. 24-25-nji aprelde dünýäniň 30-dan gowrak döwletinden köp sanly wekiliýetiň gatnaşmagynda geçirilen forumda ýurdumyzyň ýangyç-energetika toplumynda amala aşyrylýan täze maýa goýum taslamalary giňden tanyşdyryldy.