Halkara derejeli iri sport ýaryşlarynyň merkezine öwrülýän merjen paýtagtymyzda geçen hepdede ýene bir baýramçylyk — hokkeý boýunça halkara ýaryş geçirildi. Güneşli Türkmenistandaky hokkeý baýramçylygy ýurdumyzda sport giňişliginiň has uzaýandygyna ýene bir ýola şaýatlyk etdi.
Bir hepdeläp milli teleýaýlymlarymyzyň ikisi boýunça göni ýaýlymda alnyp görkezilen, dünýäniň 40-dan hem gowrak döwletine wekilçilik edýän metbugat sahypalarynda şöhlelendirilen halkara ýaryşa on döwletden on topar gatnaşdy. Şol sanda ýaryşa ýurdumyzdan Türkmenistanyň Içeri işler ministrliginiň «Galkan» hokkeý topary wekilçilik etdi.
