Sport ýaryşlarynyň merkezine öwrülen ak şäherimiz Aşgabatda şu günler ýene bir ajaýyp sport baýramçylygy — Kuraş boýunça dünýä çempionaty dowam edýär. Dabaralaryna 23-nji noýabrda badalga berlen çempionatyň ýaryşlary düýn başlandy.
Taryhda 14-nji gezek geçirilýän dünýä çempionatyna Ýer ýüzüniň 50-den gowrak döwletinden 500-e ýakyn myhman gatnaşýar. Dünýä çempionatynyň ýaryşlary 15 agram derejesinde geçirilýär: şol sanda olaryň 7-si erkekleriň, 8-si bolsa zenanlaryň arasyndaky ýaryşlara degişlidir. Dünýä çempionatyna 15 türgen bilen gatnaşýan Türkmenistanyň erkekler we zenanlar ýygyndylaryny Türkmenistanyň at gazanan tälimçileri Dörtguly Tejenow bilen Şirin Kubaýewa taýýarlady.
