Ýurdumyzda bedenterbiýäni we sporty ösdürmekde, ýaşlary sporta köpçülikleýin çekmekde uly tagallalar edilýär. Halkyň saglygyny berkidip, sagdyn durmuş ýörelgesiniň berkararlygyny gazanmakda möhüm ähmiýete eýe şu çäreler giňden ýaýbaňlandyrylýar. Şeýle işler hormatly Prezidentimiziň öňe sürýän sport syýasatynyň durmuşa geçirilmegine itergi berýär.
Golaýda TMÝG-niň etrap geňeşiniň guramagynda Garagum etrabynyň sport mekdebinde ýokary synp okuwçy gyzlaryň arasynda sportuň woleýbol görnüşi boýunça ýaryş geçirildi. Ýaryş çekeleşikli geçip, woleýbolçylardan düzülen toparlar oňa ykjam taýýarlykly gelendiklerini äşgär etdiler. Eminler toparynyň gelen kararyna laýyklykda 1-nji orna etrabyň 8-nji orta mekdebiniň woleýbolçy gyzlary mynasyp boldular. 2-nji we 3-nji orunlary degişlilikde 23-nji we 1-nji orta mekdepleriň woleýbolçy toparlary eýelediler. Ýaryşyň ýeňijilerine TMÝG-niň etrap geňeşi tarapyndan ýadygärlik sowgatlar we Hormat hatlary dabaraly ýagdaýda gowşuryldy. Şeýle sport ýaryşlary ýaşlary sporta çekmekde gowy netijesini berýär.
