Biz daglara baksak, onuň beýikdigini aýtmazdan, belentlik hakynda oýlanýarys. Asmana garan mahalymyz, ümmülmez giňişlik baradaky pikirler hakydada orun alýar. Deňiz diýsek, ozaly bilen, çuňluk hakyndaky pelsepeler ýadymyza düşer. Şonuň ýaly, ýaşlyk diýilse hem, gujur-gaýrat, joşgun, hyjuw dogrusynda pikir ýöredip başlaýarsyň. 2023-nji ýylyň «Arkadag Serdarly bagtyýar ýaşlar ýyly» diýlip yglan edilmegi türkmenistanly ýaşlary galkyndyrdy, olary has joşgunly işlemäge ruhlandyrdy. Türkmenistanyň Magtymguly adyndaky Ýaşlar guramasynyň Merkezi Geňeşiniň, Türkmenistanyň Magtymguly adyndaky Ýaşlar guramasynyň Merkezi Geňeşiniň ýanyndaky «Arkadagly Ýaşlar» atly elektron žurnalynyň, Türkmenistanyň Bedenterbiýe we sport baradaky döwlet komitetiniň «Türkmenistan Sport» halkara žurnalynyň bilelikde guramagynda «Arkadag Serdarly bagtyýar ýaşlar» atly 2023-nji ýylyň şygaryna bagyşlanan döredijilik bäsleşiginiň geçirilmegi bolsa ýaşlaryň döredijilik ylhamyny joşdurdy. Çünki bäsleşige gatnaşmak we öz oýlanmalaryny, goşgularyny, makalalaryny okyjylar bilen paýlaşmak her bir döredijilik adamynyň baş arzuwydyr.

Bäsleşigiň talyplaryň we okuwçylaryň arasynda yglan edilmegi, şeýle-de oňa žurnalistikanyň, edebiýatyň žanrlarynda ýazylan ähli makalalaryňdyr goşgularyň, oýlanmalaryňdyr söhbetdeşlikleriň kabul edilendigi ýaşlara döredijilik erkinligini berdi. Döredýän ýaşlaryň, şol sanda okuwçylaryň öz deň-duşlary bilen bir hatarda, bäsleşige gatnaşmaga mümkinçilik almagy, 2023-nji ýylyň buýsançly şygaryny ruhubelentlik bilen wasp etmäge, özlerine döredilýän şertleri döredijiliklerinde açyp görkezmäge ýol açdy. Şeýlelikde, ozaldan bilýän hakykatymyza ýene bir gezek göz ýetirdik.