Ýurdumyzyň ösümlik we haýwanat dünýäsiniň baýlyklaryny gorap saklamak, köpeltmek, geljekki nesillere ýetirmek şu günki günüň wajyp wezipeleriniň biridir. Hormatly Prezidentimiziň ýolbaşçylygynda ýurdumyzyň ykdysady ösüşini daşky gurşaw bilen sazlaşykly alyp barmaga, ýaşaýşyň ekologiýa taýdan arassa gurşawyny döretmäge gönükdirilen toplumlaýyn we uzak geljegi nazarlaýan parasatly ekologiýa syýasaty barha dabaralanýar. Diýarymyzyň tebigy baýlyklaryny gorap saklamak, aýawly we rejeli peýdalanmak, ykdysadyýete sanly ulgamy ornaşdyrmak, ýurdumyzda we sebitde ekologiýa howpsuzlygyny üpjün etmek Türkmenistanyň döwlet syýasatynyň esasy ugurlarynyň birine öwrüldi.

Tebigatymyzyň haýwanat dünýäsiniň täsin jandarlarynyň biri-de keýiklerdir. Olar Sarygamyş çöketliginde, Bathyzda, Garabilde, ýurdumyzyň demirgazyk-günbatarynda Garagumda gabat gelýärler.