Daşky gurşawy goramak, tebigata aýawly garamak, onuň gözelliklerini we baýlyklaryny geljek nesiller üçin saklap galmak hormatly Prezidentimiziň durmuşa geçirýän döwlet syýasatynyň ileri tutulýan ugrudyr. Milli Liderimiz adamlaryň saglygyny goramagyň, ýaşaýyş-durmuş we dynç almagy üçin oňaýly şertleri döretmegiň möhüm şerti hökmünde bu giň möçberli işiň durmuşa geçirilmegine aýratyn üns berýär.

Häzirki wagtda paýtagtymyzyň günorta künjeginde, Köpetdagyň eteginde pürli hem-de saýaly agaç nahallaryndan ybarat tokaý zolaklarynyň çägi has-da giňelýär. Munuň özi tebigatymyzyň ösümlik dünýäsini baýlaşdyrýar hem-de arassa howany üpjün edýär. Şeýlelikde, ýurdumyzda ekologiýa howpsuzlygynyň pugtalandyrylmagy ýaly wajyp wezipeler üstünlikli durmuşa geçirilýär.