Men tomus paslyny mamamlarda geçirmegi halaýardym. Haly we keçe sungatynyň ussady bolan mamam bize arly tomus el işini öwrederdi. Ol «Ulugyz saçyny sallap, bikär, oba-arada söw-söw syryp ýörse halanylmaýar» diýerdi. Pyňkyrsaň, gatyrak gülseň hem halamazdy. «Özüni sylaýan, namysjaň, uýat-haýaly gyzyň sesi ýedi ädimden uzaga eşidilmeli däldir» diýerdi.

Tomsuna mamam goýnuň güýz gyrkymynyň ýüňüni akar suwda ýuwup, soňra saýgyç bilen mazaly saýardy-da, ýüň darak bilen öňümizde goýardy. Biz ýüň darap, halta-halta edip pişge ederdik. Goňşy gyzlar hem gelip ýüň daraşmaga, saýylanda tüýdülmän galan ýüňleri tüýdüşmäge kömek ederdiler. Şol ýerde hem gyzykly gürrüňler edilerdi.