Hemişelik Bitaraplygymyzyň 29 ýyllyk senesiniň uludan toýlanýan günlerinde dürli maksatly döwrebap binalaryň dabaraly ýagdaýda ulanmaga berilmegi täze taryhy eýýamyň bagtyýarlygynyň özboluşly subutnamasy bolup durýar. Welaýatymyzyň Gyzylarbat etrabynyň pensiýa gaznasynyň bölüminiň täze edara binasynyň açylyş dabarasy hem munuň güwäsidir. Etrap merkeziniň gözel ymaratlarynyň hataryny artdyran, daş-töweregine mydama gök öwsüp oturýan bag nahallary ekilen döwrebap edara binasynyň açylyş dabarasyna etrap häkimliginiň, edara-kärhanalaryň ýolbaşçylary, ýaşuly nesliň wekilleri, elleri baýdakly, al-elwan gülli talyplar, köp sanly ýerli ýaşaýjylar ýokary ruhubelentlikde gatnaşdylar.