«Pähim-paýhas ummany Magtymguly Pyragy» ýylynyň şanly wakalara beslenýän günlerinde ýurdumyzda halkara maslahatlar, sergilerdir forumlar yzygiderli geçirilýär. Türkmenistanyň başlangyjy bilen BMG-niň Baş Assambleýasy tarapyndan 26-njy noýabr — «Bütindünýä durnukly ulag güni» diýlip yglan edildi. Bu senede 2016-njy ýylda Birleşen Milletler Guramasy bilen hyzmatdaşlygyň çäklerinde Durnukly ulag ulgamy boýunça ählumumy maslahaty geçirilipdi. Ata Watanymyzyň paýtagty Aşgabat şäherinde bu senäni dabaralandyrmak maksady bilen, 2024-nji ýylyň 26-27-nji noýabrynda «Halkara ulag-üstaşyr geçelgeleri: özara baglanyşyk we ösüş — 2024» atly halkara maslahat we sergi geçirildi. Bu çäre Bütindünýä durnukly ulag gününe bagyşlandy.

Türkmenistan sebit hem-de halkara ulag we maglumat-kommunikasiýa ulgamlaryna işjeň goşulmak ugrunda halkara ulag-üstaşyr mümkinçiliklerini artdyrýar. Ýurdumyz Beýik Ýüpek ýolunyň täzeden dikeldilýän şertlerinde ulaglaryň ähli görnüşleriniň arabaglanyşygyny üpjün etmek ugrunda iri maýa goýum taslamalaryny durmuşa geçirýär. Demir ýol, awtomobil, howa we deňiz gatnawlarynyň görkezijileri ýylsaýyn ýokarlanýar.