Paýtagtymyzda tennis boýunça «Ashgabat Open 2024» atly halkara ýaryş üstünlikli geçirilýär

Sportuň we sagdyn durmuş ýörelgeleriniň rowaçlanýan ýurdy hökmünde dünýäde ykrar edilen Watanymyzyň paýtagty Aşgabatda nobatdaky halkara ýaryş üstünlikli geçirilýär. 11-nji noýabrda Aziýa we Ýewropa ýurtlaryndan türgenleri paýtagtymyza jemlän 14 ýaşa çenli ýetginjek oglan-gyzlaryň arasyndaky tennis boýunça «Ashgabat Open 2024» atly halkara ýaryşyň açylyş dabarasy boldy. Bu waka Aşgabadyň halkara sport merkezi hökmünde ykrar edilýändiginiň, hormatly Prezidentimiziň hem-de türkmen halkynyň Milli Lideri Gahryman Arkadagymyzyň tagallalary esasynda bedenterbiýäni, sporty ösdürmäge gönükdirilen işleriň halkara derejede giň goldawa eýe bolýandygynyň nobatdaky subutnamasydyr.