«Türkmenistan — ruhubelentligiň we sagdynlygyň ýurdy» atly XIV spartakiadanyň çägindäki ýaryşlar Gökdepe etrabynda hem guramaçylykly ýagdaýda geçirilýär. Etrapdaky 14-nji orta mekdepde geçen kiçi futbol ýaryşynyň etrap tapgyry uly gyzyklanma döretdi. Ony “Türkmenistan” Ýaşlar bedenterbiýe-sport guramasynyň welaýat bölüminiň, etrabyň bedenterbiýe we sport bölüminiň, etrap bilim bölüminiň hem-de jemgyýetçilik guramalarynyň bilelikde gurandygyny bellemek gerek.

Etrapdaky orta mekdepleriň okuwçylarynyň ýaryşa göwnejaý taýýarlyk görendiklerini gyzykly geçen duşuşyklar subut etdi. Duşuşyklaryň netijesinde etrapdaky 19-njy orta mekdebiň topary birinji, 11-nji orta mekdebiň topary ikinji, 14-nji orta mekdebiň topary üçünji orna mynasyp boldy. Birinji orny eýelän topar ýaryşyň welaýat tapgyryna gatnaşar.