«Ashgabat Open 2024» halkara tennis ýaryşy paýtagtymyzdaky Olimpiýa şäherçesiniň döwrebap Tennis toplumynda gyzykly we çekeleşikli ýagdaýda dowam edýär. Duşuşyklar tapgyrma-tapgyr geçirilip, olarda ökdeler öňe saýlanýar. 11-nji noýabrda ýaryşyň birinji, düýn bolsa ikinji tapgyrynyň duşuşyklary geçirildi.

Öňňin Tennis toplumynyň 5 kortunda 22 duşuşyk boldy. Olaryň ählisi ýekeleýin görnüşde geçirilip, günüň birinji ýarymynda oglanlar, ikinji ýarymynda bolsa gyzlar güýç synanyşdylar. Türkmen tennisçilerinden Süleýman Hudaýberdiýew, Aly Geldiýew, Ilýas Mämmetgulyýew, Ýasin Faýzullaýew, Erkin Altyýew, Kerimgeldi Welibegow, Eýýupbeg Atajanow, gyzlardan Sülgün Işankulyýewa, Sähra Garahanowa, Leýli Esenowa dagy şowly çykyş edip, deň-duşlaryndan saýlanmagy başardylar. Şol günki duşuşyklarda malaýziýaly, iordaniýaly, pakistanly türgenler hem ussatlyk görkezdiler.