Türkmenistanly samboçy, Köýtendag etrabyndaky 3-nji sport mekdebiniň tälimçisi Muminjan Arzikulow Gazagystanyň Astana şäherinde geçirilen dünýä çempionatynda hormat münberiniň iň ýokarky basgançagyna çykmagy başardy. 71 kilograma çenli agram derejesinde çykyş eden ildeşimiz bu üstünligini söweş sambosy boýunça gazandy.

26 ýaşly türgen altyn medala uzan ýolda ilkinji tutluşygyny ukrainaly Andreý Kuçerenko bilen geçirdi. Munda ýeňiş gazanmak ildeşimiz üçin ýeňil düşmedi. Çünki tutluşygyň agramly böleginde güýçler deňeçer geldi. Hatda türgenleriň ikisem deň — 4 utukdan gazandylar. Ýöne käbir artykmaçlyklar bilen öňe saýlanan ildeşimiz adyny 1/8 finala ýazdyrmagy başardy. Bu tutluşyklar Muminjan Arzikulow üçin kyn düşmedi. Ol 1/8 finalda özbegistanly Şerbek Hujamkulowy 11:1, çärýek finalda serbiýaly Stefan Zupariçi 5:1 hasabynda ýeňdi. Şeýlelikde, gyrgyzystanly türgen Zamirbekulu Kurmanbek bilen ýarym finala çykan ildeşimiz güýçli garşydaşyny 3:1 hasabynda ýeňip, adyny finala ýazdyrdy.