Häzirki ajaýyp döwrümizde Gahryman Arkadagymyzyň, Arkadagly Gahryman Serdarymyzyň tagallalary bilen durmuşa geçirilýän beýik işler, döredilýän giň mümkinçilikler ýaşlaryň sport üstünliklerine eýe bolmagyny üpjün edýär. Esasan hem, ýurdumyzda iri halkara ýaryşlary geçirilip durulýar. Şonuň üçin Türkmenistan dünýäde sportuň we bedenterbiýäniň ösýän ýurdy, halkara ýaryşlaryň geçirilýän merkezi hökmünde tanalýar. Ynha, şeýle sport baýramçylygynyň biri-de paýtagtymyz Aşgabat şäherinde geçirilýär hem-de dünýäde uly gyzyklanma döredýär.

«Ashgabat Open 2024» atly halkara ýaryş Olimpiýa şäherçesindäki Tennis toplumynda geçirilýär. Özi hem bu ýaryşa dünýäniň ençeme döwletlerinden eminleriň, tälimçileriň, türgenleriň gelendiklerini bellemek gerek. Has takygy, halkara ýaryşa Özbegistandan, Birleşen Arap Emirliklerinden, Eýran Yslam Respublikasyndan, Täjigistandan, Malaýziýadan, Türkiýeden, Beýik Britaniýanyň we Demirgazyk Irlandiýanyň Birleşen Patyşalygyndan, Iordaniýadan, Hindistandan hem-de Gazagystandan türgenler gatnaşýarlar. Munuň özi ýurdumyzda geçirilýän iri sport ýaryşlarynyň ýokary derejä eýe bolýandygyny aýdyň beýan edýär.