Şu gün ― 11-nji noýabrda paýtagtymyzda badalga berlen halkara derejeli tennis ýaryşy ýurdumyzda sporta höwesek ýaşlaryň sanyny has-da artdyrar. «Ashgabat Open 2024» diýlip atlandyrylýan halkara ýaryşyň 14 ýaşa çenli ýetginjekleriň arasynda geçirilmegi bolsa bilim işgärleriniň we mekdep okuwçylarynyň bu ýaryşa bolan gyzyklanmasyny has-da artdyrýar.

Ýaryşda biziň welaýatymyzyň ezber tennisçileri hem dünýäniň çar künjünden gelen deň-duşlary bilen güýç synanyşmak bagtyna eýe bolarlar. Welaýatymyzda sportuň bu görnüşi boýunça kämil mekdebiň emele gelendigini aýtmak gerek. Ýurdumyzyň ozalky birinji raketkasy Anastasiýa Prenko ýaly dünýä meşhur lebaply tennisçileriň üstünliklere beslenen ýoluny Aly Geldiýew, Sabrina Rahmanowa ýaly eýýäm özüni halkara ýaryşlarynda görkezmegi başaran köpsanly ýaş tennisçilerimiz dowam etdirýärler. Biz bir hepdeläp dowam etjek ýaryşda ildeşlerimize janköýerlik edip, her bir duşuşykda olary goldarys.