Ilçilik-dä. Durmuşda her hili täsin adamlar bolýar. Garaja aga hem şeýle adamlaryň hilindendi. Süňkbaşy iri, pälwansypat adamdy. Oturanda-turanda juda ýeňil gopýardy. Garaja aga ulaga münmäni halanokdy. Ol minneti iki aýagyndan çekýänlerdendi. Haçan görseň pyýadadyr, ýörände yzyna eýerip bilmersiň.

Garaja aga aýdym-saza-da uly sarpa goýýan adamdy. Käwagt eline dutar alyp, aýdyma-da hiňlenäýmesi bardy. Ol atly bagşy-sazandalar bilenem ýakyn aragatnaşykdady. Türkmenistanyň halk artisti Han Akyýew, Türkmenistanyň at gazanan artisti Gurbannazar Nurymow dagy aram-aram onuňka myhmançylyga gelýärdiler.