Watana gulluk etmek her bir ynsan üçin beýik mertebe, onuň mukaddes goragyna ömrüňi bermek bolsa, bagtyň çürbaşy bolsa gerek. Çünki dünýäde mukaddes zatlaryň goragy her kese ynanylmaýar ahyryn. Ýurt goragyny ykbal saýlan merdanalaryň eginlerine ýyldyz dakylmagy hem ýönelige däl. Owaldan-ahyra mukaddesligiň nyşany saýylyp gelen mawy gögüň goýnuny bezän ýyldyzlaryň keşbini adamzat paýhasy, megerem, mukaddes topraklaryň goragyna ykbalyny bagyş edip, dünýä, il-güne parahatlygy peşgeş eýläp bilen merdana gerçeklere mynasyp görendir. Biziň aýtmak isleýän esasy gürrüňimiz dost-doganlyk araçäklerimizde gije-gündiz sak duran şol merdana ýigitlerimiziň öz gulluk borçlaryny üstünlikli berjaý etmekleriniň aňyrsynda mukaddes ojaklaryndan gözbaş alan zenan yhlasy hakynda.