Golaýda ýurdumyzyň ýokary okuw mekdepleriniň ÝUNESKO klublarynyň we kafedralarynyň ýolbaşçylary bu ugurda tejribe alyşmak üçin Belarus Respublikasynyň Minsk şäherinde iş saparynda boldular. Saparyň dowamynda mugallymlar ÝUNESKO klublarynyň Belarus assosiasiýasynda, ÝUNESKO klublarynyňdyr kafedralarynyň birnäçesinde myhmançylykda boldular. Assosiasiýanyň agzalary myhmanlary alyp barýan işleri bilen tanyşdyryp, durmuşa geçirilýän halkara taslamalar we maksatnamalar, bu babatda ugurdaş düzümler bilen yzygiderli giňeldilýän hyzmatdaşlyk gatnaşyklary barada gürrüň berdiler. ÝUNESKO klublarynda ýaşlary watansöýüjilik ruhunda terbiýelemek, ekologik bilimi we sagdyn durmuş ýörelgelerini ösdürmekde alnyp barylýan işler, ony has-da ilerletmegiň ugurlary barada hem söhbet edildi.

Mugallymlar «Gyzykly işleriň merkezi» atly klubda myhmançylykda bolup, onuň işi hem-de ýurdumyzyň ýokary okuw mekdepleriniň klublarynyň işjeňligi bilen belarus kärdeşlerini tanyşdyrdylar. Klubuň agzalary ýöriteleşýän ugurlary boýunça geçirýän medeni çäreleri barada gürrüň berdiler.