Ahal welaýatynyň Gökdepe etrabynyň medeniýet köşgünde Türkmenistanyň halk bagşysy Täçmämmet Suhangulyýewiň doglan gününiň 160 ýyllygy mynasybetli aýdym-sazly dabara geçirildi. «Halypalaryň mekdebi — halkyň ruhy mirasy» atly dabara tanymal sungat ussatlary, halypalar, şahyrlar, jemgyýetçilik guramalarynyň wekilleri, ýaşlar we beýleki hormatly myhmanlar gatnaşdylar.

Welaýat Medeniýet müdirligi tarapyndan guralan dabaranyň myhmanlary medeni ojagyň toý öwüşginli eýwanynda dutarçy bagşy-sazandalaryň çykyşlary bilen garşylanyldy. Ildeşlerimiz ol ýerde amaly-haşam sungatynyň giňden ýaýbaňlandyrylan, halk senetçiliginiň baý görnüşlerini, milli gymmatlyklary özünde jemleýän sergisini uly gyzyklanma bilen synladylar.