Üstümizdäki aýy Magtymguly Pyragynyň doglan gününiň 300 ýyllygy mynasybetli dabaralaryň has giň gerimde bellenilýän aýy hökmünde häsiýetlendirsek, hakykatdan daş düşmeris. Ýakynda merjen paýtagtymyzda «Döwürleriň we siwilizasiýalaryň özara arabaglanyşygy — parahatçylygyň we ösüşiň binýady» atly geçirilen halkara forum hem muny doly tassyklaýar.

Dünýä halklarynyň bilelikdäki ösüşi üçin iňňän ähmiýetli cözgütleriň kabul edilen forumyň yzysüre Arkadag şäherinde ýurdumyza «Ahalteke atçylyk sungaty we atlary bezemek däpleri» atly milli hödürnamanyň ÝUNESKO-nyň Adamzadyň maddy däl medeni mirasynyň sanawyna girizilendigini tassyklaýan şahadatnamanyň gowşurylmagy ýakymly günleriň ýakymyny has-da artdyrdy. Mundan bir ýyl ozal ― 2023-nji ýylyň dekabrynda ÝUNESKO-nyň Maddy däl medeni mirasy goramak boýunça hökümetara komitetiniň Botswana Respublikasynyň Kasane şäherinde geçirilen 18-nji mejlisinde kabul edilen çözgüdi Ýer ýüzüniň 24 döwleti goldap çykyş edipdi.