Ýurdumyzyň saglygy goraýyş, bilim we sport ulgamlary uly ösüşlere beslenýär. Bu ulgamlara häzirki zaman tejribeleriniň işjeň ornaşdyrylmagy bilen, oňyn netijeler gazanylýar. Şoňa görä-de, şu ýylyň 9 — 12-nji oktýabrynda paýtagtymyzdaky Olimpiýa şäherçesiniň Başa-baş söweş sungaty sport toplumynda ýurdumyzda giňden bellenilýän Saglygy goraýyş we derman senagaty işgärleriniň güni mynasybetli «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara serginiň we onuň çäklerinde ylmy maslahatyň geçirilmegi möhüm ähmiýete eýedir. Saglygy goraýyş we derman senagaty, Bilim ministrlikleriniň, Bedenterbiýe we sport baradaky döwlet komitetiniň bilelikde guramagynda ýaýbaňlandyrylan halkara forum lukmançylyk ylmynyň, bilim, sport ulgamlarynyň soňky gazananlaryny durmuşa ornaşdyrmaga we daşary ýurtly hyzmatdaşlar bilen gatnaşyklary mundan beýläk-de pugtalandyrmaga ýardam berýän platformalaryň birine öwrüldi.