Berkarar döwletiň täze eýýamynyň Galkynyşy döwründe Arkadagly Gahryman Serdarymyzyň parasatly baştutanlygynda ýurdumyzyň ähli pudaklary ýaly, saglyk ulgamy hem uly ösüşlere eýe bolýar. Gözel Diýarymyzyň ähli ýerlerinde daşary ýurt kompaniýalarynyň kämil enjamlary bilen enjamlaşdyrylan döwrebap hassahanalardyr saglyk öýleri gurlup, ulanmaga berilýär. Öňden bar bolan hassahanalaryň we saglyk öýleriniň durky düýpgöter täzelenýär. 9-njy oktýabrda Saglygy goraýyş we derman senagaty işgärleriniň güni mynasybetli açylyp ulanmaga berlen Mary welaýatynyň arassaçylyk we keselleriň ýaýramagyna garşy göreşmek gullugynyň täze binasy hem özüniň ajaýyplygy, dünýä ülňülerine kybap gelýändigi bilen tapawutlanýar.

4 gatdan ybarat bolan binada arassaçylyk we gigiýena, keselleriň ýaýramagyna garşy göreşmek we iýmit ugurlary boýunça täze innowasion tehnologiýalar we tejribeler durmuşa ornaşdyrylar hem-de degişli barlaghanalaryň işini sazlamak hem-de olary yzygiderli barlamak, metrologiýa taýdan üpjün etmek hem-de barlaghana işlerine gözegçilik barlaglaryny geçirmek çäreleri amala aşyrylar.