Daşoguz şäherindäki «Şabat» açyk görnüşli paýdarlar jemgyýeti süýt önümlerini öndürmekde we halka ýetirmekde welaýatymyzda adygan hususy kärhanalaryň biri hasaplanylýar. Çünki onuň ilata hödürleýän önümleri köpçüligiň uly isleginden peýdalanýar. Şonda bu ýerde öndürilýän hem-de ýerlere ugradylýan 20-den gowrak görnüşdäki süýt önümleri ýokary hilliligi, täzeligi, gelşikli gaplara gaplanandygy bilen tapawutlanýar.

Kärhananyň işçi-hünärmenleri şu ýylyň geçen dokuz aýynda hem gaýratly zähmet çekip, ýokary netijeleri gazandylar. Olar şu döwrüň dowamynda 4,5 million manatlyga golaý süýt önümlerini alyjylara ýetirmegiň hötdesinden geldiler. Şeýlelikde, kärhanada döwrebap enjamlary ulanmak arkaly alnyp barylýan işler oňat netijesini berýär. Bu hem onuň şu şan-şöhratly ýylymyzy üstünlikli jemlemegine şert döredýär.