Parasatly pederlerimiziň ata Watanymyzy, ene topragymyzy söýmekde we gözüň göreji deýin goramakda görkezen edermenlikleri, gahrymançylyklary, taryhymyzyň şöhratly seneleri bilen baglanyşykly wakalaryň täsiri halkymyzyň hakydasynda ebedi ýaşaýar. Watanyň garaşsyzlygy, halkyň agzybirligi we parahat durmuş ugrunda döş geren şöhratly pederlerimiziň geçen taryhy ýoly, il-güne ygrarlylygy, gaýduwsyzlygy, watansöýüjiligi ýaş nesliň kalbynda uly joşgun döredýär. Biz Watana we halka wepaly nesiller hökmünde olary hormatlaýarys, il ogullarynyň hatyrasyny belent tutup, nusga alarlyk edermenliginiň öňünde baş egýäris.

Dürli söweşlerde, şol sanda XX asyryň iň bir pajygaly wakasy hökmünde ynsanyýetiň hakydasynda orun alan 1941 — 1945-nji ýyllaryň urşunda deňsiz-taýsyz edermenlik görkezen watandaşlarymyzyň hatyrasyny beýgeltmek biziň her birimiziň borjumyzdyr. Berkarar döwletimizde Watan üçin janlaryny gurban eden merdana ata-babalarymyzyň deňsiz-taýsyz gahrymançylygyna çäksiz hormat goýulmagy halkymyzyň öz ruhy-ahlak gymmatlyklaryna we köpasyrlyk däplerine ygrarlylygyň ajaýyp nusgasydyr. Watançylyk terbiýesini, milli ýörelgelerimiziň gymmatyny ýaş nesliň gursagyna guýmakda halkymyzyň taryhynda yz goýan gerçeklerimiziň göreldesi uludyr. Milli Liderimiziň atasy edermen esger, ilhalar ynsan Berdimuhamet Annaýew hem Watany goramak ýaly belent harby borja wepaly şahsyýetleriň biri. Onuň ýokary gahrymançylyga we döredijilige ýugrulan durmuş ýoly, edermenligi ýaş nesil üçin zähmetsöýerligiň, watanperwerligiň, gaýduwsyzlygyň beýik mekdebidir. Berdimuhamet Annaýew ilkinjileriň hatarynda fronta gidip, il-gününiň asudalygy ugrunda mertlerçe söweşipdir. Jeň meýdanynda ýaralanandygy zerarly yzyna gelenden soňra tutuş ömrüni ýaş nesli terbiýelemek ýaly asylly işe bagyş edipdir. Gahryman Arkadagymyzyň we hormatly Prezidentimiziň ýaşlar bilen ýygy-ýygydan duşuşyp, olaryň berkarar döwletimize, mukaddes topragymyza mynasyp nesiller bolup ýetişmekleri üçin öwüt-ündewlerini bermekleri biziň watançylyk ruhumyzy has-da beýgeldýär. Ata-babalarymyzyň gahrymançylykly durmuş ýoly, asylly görüm-göreldesi üstünden ençeme ýyl geçse-de, watandaşlarymyzyň uludan-kiçisini il-ýurt bähbitli işlere ruhlandyryp, jemgyýetimiziň watançylyk, döredijilik kuwwatyny beýgeldýär. Hut şonuň üçin hem berkarar döwletimizde her ýylyň 6-njy oktýabrynda Hatyra güni bellenilip, 1948-nji ýylyň Aşgabat ýertitremesinde we söweş meýdanlarynda wepat bolan watandaşlarymyzyň gahrymançylykly ýollary ýatlanylýar. Hatyra dessurlarynyň berjaý edilmegi milletimiziň ynsanperwerlik, döwletlilik, sahawatlylyk ýörelgeleriniň ýaş nesilleriň aňynda müdimilik orun almagyna mümkinçilik berýär.