Halkymyz sagdynlygy, ruhubelentligi gadymy döwürlerden bäri mizemez durmuş ýörelgelerine öwrüp, nesilden-nesle geçirip gelýär. Gahryman Arkadagymyzyň, Arkadagly Gahryman Serdarymyzyň taýsyz tagallalary netijesinde Berkarar döwletiň täze eýýamynyň Galkynyşy döwründe ynsan saglygyny gorap saklamakda, köpçülikleýin bedenterbiýäni we sagdyn durmuş ýörelgelerini giňden ýaýbaňlandyrmakda durmuşa geçirilýän işler has-da rowaçlanýar. Sporty ösdürmekde, jemgyýetimize sagdyn durmuş ýörelgelerini berk ornaşdyrmakda, zyýanly endiklere garşy barlyşyksyz göreşmekde, daşky gurşawy goramakda tutumly işler amala aşyrylýar. Bular babatda iri möçberli taslamalaryň, maksatnamalaryň üstünlikli durmuşa geçirilmegi ata Watanymyzy sagdynlygyň, abadançylygyň, bagtyýarlygyň mekany hökmünde dünýä äşgär etdi.

Ýurdumyzda bedenterbiýe we sporty ösdürmek adamlaryň bagtyýar durmuşyny üpjün etmegiň möhüm şertleriniň biridir. Güneşli Diýarymyz sagdyn durmuş ýörelgeleriniň rowaçlanýan ýurdudyr. Milli Liderimiz we hormatly Prezidentimiz köpçülikleýin bedenterbiýäniň we sportuň giň gerime eýe bolmagy üçin ýadawsyz aladalary edýärler. Bu ugurda badalga berilýän başlangyçlar üstünliklere beslenýär. Ýurdumyzyň bagtyýar raýatlarynyň, esasanam, ýaşlaryň arasynda dürli sport çäreleri giň gerime eýe bolýar. Ýaş nesliň bedenterbiýe we sport hereketine giňden çekilmegi, sagdyn durmuş ýörelgeleri ruhunda terbiýelenmegi olaryň watansöýüji, ruhubelent, dogumly, sagdyn pikirlenip bilýän, islendik meselede paýhasly netije çykarmagy başarýan, geljege ynamly garaýan adamlar bolup kemala gelmegine uly ýardam edýär.