Şu gün Türkmenbaşynyň Erkin döredijilik mekanynda «Edebiýat we sungat» gazetiniň redaksiýasynyň, Türkmenistanyň Senagatçylar we telekeçiler partiýasynyň Ahal welaýat komiteti bilen bilelikde ýylyň başynda yglan eden «Änew: geçmişi we şu güni» atly döredijilik bäsleşiginiň ýeňijilerini sylaglamak dabarasy boldy. Ol üstümizdäki 2024-nji ýylda Änew şäheriniň «Türki dünýäniň medeni paýtagty» diýlip yglan edilmegine bagyşlandy. Oňa ýurdumyzyň döredijilik dünýäsiniň wekilleri, ýokary okuw jaýlarynyň talyp ýaşlary gatnaşdylar. Erkin döredijilik mekanynyň mejlisler zalynda geçen bu baýramçylyk çäresi Garaşsyzlygymyzyň 33 ýyllygy mynasybetli guramaçylykly we ruhubelent ýagdaýda geçen özboluşly medeni baýramçylyga öwrüldi.

Baýramçylyk dabarasynyň başynda «Edebiýat we sungat» gazetiniň baş redaktory O.Allaberdiýewa bu ýere ýygnananlary şanly Garaşsyzlygymyzyň toý dabaralary mynasybetli gutlady. Soňra Türkmenistanyň Senagatçylar we telekeçiler partiýasynyň Ahal welaýat komitetiniň başlygy O.Kazakowa, Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň baş ylmy işgäri, filologiýa ylymlarynyň kandidaty G.Ylýasowa, «Bereketli toprak» gazetiniň jogapkär kätibi A.Ataýewa, Türkmen döwlet medeniýet institutynyň talyby, «Edebiýat we sungat» gazetiniň habarçysy S.Haýdarow dagy çykyş etdi. Ondan soňra döredijilik bäsleşiginiň ýeňijilerine Hormat hatlary we ýadygärlik sowgatlary dabaraly ýagdaýda gowşuryldy.