«Türkmenistanyň ilatynyň sagdyn iýmitlenmegi boýunça 2020 — 2025-nji ýyllar üçin Milli Maksatnamasy» hereketde

Düýe çaly ilat arasynda uly isleg bildirilýän şypaly içgidir. Düýe malynyň süýdünden taýýarlanylýan çal ir döwürlerden bäri teşneligi gandyryjy, iýmitlik önümi hökmünde giňden meşhurdyr. Düýe süýdüniň düzümindäki ýokumly maddalaryň mukdary sygyr süýdüniňkiden 2 — 3 göterim köpdür. Düýe süýdi düzüminde gandy we doýgun ýaglary az saklaýan önümdir. Düýe çaly taýýarlananda süýt çigligine gönezlik üçin niýetlenen goruň üstüne garylýar. Şondan 20 — 25 minut geçensoň (temperatura baglylykda) goýy köpürjik goruň üstüne galýar. Oňa agaran diýilýär. Düýe çaly öz-özüne gor bolup hyzmat edýär. Çal küýzelerde we syrçaly gaplarda taýýarlanylýar. Düýe çaly taýýarlanylanda arassaçylyk düzgünleri pugta berjaý edilýär.