Ösüşiň täze belentliklerini nazarlap, ynamly öňe barýan islendik bir döwleti alyp görenimizde hem, şol ýurduň ykdysady pudagynyň binýadynyň berkdendigine göz ýetirmek bolýar. Elbetde, ykdysady pudagy hereketlendirýän esasy güýçleriň biri bolsa, ýurduň hususy pudagy. Munuň şeýledigine anyk göz ýetirmek üçin Garaşsyz, hemişelik Bitarap Türkmenistan Watanymyzyň hususy pudagynyň soňky ýyllarda bitiren işlerine ser salmak hem ýeterlikdir.

Mälim bolşy ýaly, 2008-nji ýylyň 17-nji martynda döredilen Türkmenistanyň Senagatçylar we telekeçiler birleşmesi bu gün hususyýetçi agzalaryň ençemesini birleşdirýän, telekeçilik başlangyçlaryny giňden goldaýan iri pudaklaryň birine öwrüldi. Örän gysga wagtyň dowamynda türkmen telekeçileri tarapyndan amala aşyrylan işler ýurdumyzyň ykdysadyýetini diwersifikasiýa we innowasiýa ýoly bilen kämilleşdirmekde, ähli pudaklary we ýurdumyzyň sebitlerini sazlaşykly ösdürmekde, daşary ýurtlardan getirilýän önümleriň ornuny tutýan döwrebap önümçiligi ýola goýmakda we ýurdumyzyň eksport kuwwatyny pugtalandyrmakda milli ykdysadyýetimiziň hususy bölegine aýratyn ornuň degişlidigini we bu ugurdaky işleriň döwlet tarapyndan giňden goldanylýandygyny aýdyň görkezýär.