Tebigata bolan söýgi halkymyzyň häsiýetiniň, ýaşaýyş-durmuşynyň, däp-dessurlarynyň we medeniýetiniň içinden eriş-argaç bolup geçýär. Mähriban Watanymyzyň gözel tebigatyna aýawly çemeleşmek, ony goramak ýörelgeleri halkymyzyň aňyna ornaşyp, ekologiýa meselelerini oňyn çözmegiň özboluşly tärlerini kemala getiripdir. Ata-babalarymyzyň şol ynsanperwer ýörelgeleri Berkarar döwletimiziň bagtyýarlyk döwründe has-da ösdürilýär.
Daşky gurşawy goramakda iň gowy dünýä tejribesini öwrenmek hormatly Prezidentimiziň öňde goýýan möhüm wezipesidir. Gahryman Arkadagymyzyň taýsyz tagallasy bilen sahawata we berekede baý giň sähralarymyz ýaýylyp ýatan bagy-bossanlyga, gülzarlyga öwrülýär. Güneşli ülkämiziň ýylyň ähli paslynda gök öwüsýän seýilgähleri göwnüňi göterip, tokaý zolaklary emele gelýär. Munuň özi howanyň üýtgemegi bilen baglanyşykly ýagdaýlara garşy göreşmekde uly goşantdyr.
