Döwrümiziň, durmuşymyzyň ýaraşygy, halkymyzyň milli buýsanjy bolan bedew atlarymyzyň şan-şöhraty ýyllar geçdigiçe barha belende göterilýär. «Ata yhlas edeniň ýedi arkasy ýamanlyk ýüzüni görmezmiş» diýen ynanja berk uýan ata-babalarymyz ynsan gylykly bedewlerini hemişe sarpalap gelipdir. Berkarar döwletiň täze eýýamynyň Galkynyşy döwründe bu sarpanyň arşa göterilýändigi bolsa aýratyn guwanylmaly hakykatdyr.
«Saňa at diýmerin, gardaş diýerin» diýlip waspy ýetirilen, altyn-kümüş şaý-sepler bilen bezelen, şatlyk-şowhunly toý-baýramlaryň gelşigi bolup durýan behişdi bedewlere atlanan adamyň seri howalanyp, ruhy göterilýär. Bir zada örän begenende, «Atym çykan ýaly boldum» diýip, şatlygyny il-gün bilen paýlaşan pederlerimiz bedew atyny hiç haçan ýanyndan aýyrmandyr. Ajaýyp gylyk-häsiýetli bedewleri nusgawy şahyrlarymyz hem buýsançly wasp edip, olaryň öwgüsini kemsiz ýetiripdirler. Bu günki gün ol goşgular belent heňde ýaňlanýan aýdymlara öwrülip, adamlara ruhy lezzet paýlaýar.
