«Türkmenistan Sport», № 1 (21), 2024
Berkarar döwletiň täze eýýamynyň Galkynyşy döwri halkymyza belent we çuňňur many-mazmuna ýugrulan ýyllary peşgeş berýär. Şol ýyllaryň her birini özüne mynasyp atlandyrmak hem asylly däp bolup dowam edip gelýär. Geçen 2023-nji ýylyň ýurdumyzda Arkadag Serdarly bagtyýar ýaşlar ýyly diýlip atlandyrylmagy her bir ildeşimizi öz alyp barýan ugry boýunça täze zähmet üstünliklerine ruhlandyran ýyl boldy. Şeýlelikde, ýurdumyzda bütin ýylyň dowamynda syýasatda, ykdysadyýetde, bilimde, saglygy goraýyşda, ylymda, sportda uly üstünlikler gazanyldy. Ýylyň belent üstünliklere beslenip tamamlanýan pursatlarynda Arkadagly Gahryman Serdarymyzyň «Ýaşlar — Watanyň daýanjy» atly täze ajaýyp kitabyny okyjylara peşgeş bermegi aýratyn möhüm ähmiýetli jemgyýetçilik-syýasy waka öwrüldi.
