Döwlet dolandyryşynyň netijeliligini artdyrmak, halkymyzyň ýaşaýyş-durmuş derejesini ýokarlandyrmak üçin elektron ulgamyny özleşdirmek, sanly tehnologiýalaryň mümkinçiliklerinden peýdalanmak arkaly pudaklary döwrebaplaşdyrmak meseleleri döwrüň möhüm talabydyr. Şu jähetden, ýurdumyzda ýaýbaňlandyrylan giň möçberli özgertmelere hem-de «Türkmenistanda 2019 — 2025-nji ýyllarda sanly ykdysadyýeti ösdürmegiň Konsepsiýasyna» laýyklykda, ylym, bilim we önümçilik aragatnaşyklary pugtalanýar. Ýurdumyzyň ýokary okuw mekdeplerinde täze hünärler açylýar, inženerçilik-tehniki we beýleki zerur ugurlar boýunça okatmagyň usulyýeti kämilleşdirilýär.
Türkmenistanyň Prezidenti 2020-nji ýylyň 27-nji fewralynda «Türkmenistanda elektron resminamalar dolanyşygy ulgamyny we internet-web saýtlaryny döretmek hem-de işe girizmek hakynda» Karara gol çekdi. Şunuň bilen baglylykda, paýtagtymyz Aşgabatda we welaýatlarda IT-merkezleriniň döredilmegi üçin maliýe serişdeleriniň gönükdirilmegi sanly tehnologiýalardan doly peýdalanmagy başarýan hünärmenleri taýýarlamaga we bu ugurda milli mekdepleri goldamaga, programma üpjünçiligini işläp taýýarlaýjylara ýardam bermäge şert döredýär.