Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda milli ykdysadyýetimiziň pudaklaryna sanly ulgamlar, «akylly» we «ýaşyl» tehnologiýalar, emeli aňyň mümkinçilikleri ornaşdyrylyp, halkymyzyň bagtyýar durmuşda ýaşamagy üçin ähli amatlyklar döredilýär. «Pähim-paýhas ummany Magtymguly Pyragy» ýylynyň sentýabrynda Koreýa Respublikasynyň paýtagty Seul şäherinde geçirilen «World Smart City Expo» halkara sergisinde Arkadag şäheriniň «Iň tapawutlanan «akylly» şäher», «Daşary ýurt «akylly» şäheri», «World Smart City Expo 2024» halkara sergisine goşan uly goşandy üçin» atly baýraklara mynasyp bolmagy hem munuň aýdyň nyşanydyr. 18-nji dekabrda Türkmenistanyň Oguz han adyndaky Inžener-tehnologiýalar uniwersitetinde geçirilen «Akylly» şäher: dolandyrmak, sanly, «akylly» we emeli aň tehnologiýalary, howpsuzlygy, ykdysadyýeti» atly halkara ylmy-amaly maslahat Milli Liderimiziň hem-de döwlet Baştutanymyzyň tagallalary esasynda gurlan Arkadag şäheriniň mümkinçiliklerini bütin dünýä görkezdi.
«Akylly» şäherleri gurmakda has uly üstünliklere ýetmek üçin häzirki wagtda Türkmenistanyň Oguz han adyndaky Inžener-tehnologiýalar uniwersitetiniň «Oguz han» ylmy-tehnologiýalar merkezinde daşary ýurtly tanymal hünärmenler, inženerler, alymlar, professor-mugallymlar bilen bilelikde «akylly» öý, şäher we zatlaryň interneti, olaryň dolandyrylmagyny, kiberhowpsuzlygyny üpjün etmegiň tehnologiýalaryny işläp taýýarlamak bilen bagly döwrebap tejribeler yzygiderli öwrenilýär. Uniwersitetimizde utgaşykly görnüşde geçirilen halkara ylmy-amaly maslahat bu ugurdaky işleri ulgamlaýyn esasda alyp barmak, Arkadag şäherinde «akylly» şäher konsepsiýasynyň tapgyrlaýyn ornaşdyrylyşyny we gazanylýan milli tejribeleri dünýä ýaýmak maksady bilen guraldy. Maslahata Awstriýa, Beýik Britaniýa, Belarus Respublikasy, Hytaý, Türkiýe, Özbegistan, Ýaponiýa, Malaýziýa, Hindistan, Koreýa Respublikasy, Russiýa, Gruziýa ýaly ýurtlardan alymlar, professor-mugallymlar we ýokary tehnologiýalar, akylly şäherler, emeli aň we kiberhowpsuzlyk babatda işleri alyp barýan ylmy-barlag merkezleriniň hünärmenleri gatnaşdy.
