Saparmyrat Türkmenbaşy etrabynyň «27-nji oktýabr» daýhan birleşiginde bolanymyzda, bu ýerde şaly orak möwsüminiň gyzgalaňly dowam edýändigine göz ýetirdik. «Pähim-paýhas ummany Magtymguly Pyragy» ýylynda daýhan birleşiginiň 319 kärendeçisi 3 müň 150 gektar ýerde şalynyň bereketli hasylyny ýetişdirdiler. Olar şu ýyl «sary altynyň» 14 müň tonnasyny Watan harmanyna goşmagy maksat edinýärler. Hojalykda orak möwsümine welaýatymyzyň «Obahyzmat» önümçilik kärhanalarynyň 60-a golaý kuwwatly kombaýnlary gatnaşýar. Ýaş şalyçy kärendeçi, TAP-nyň işjeň agzasy Arslanmyrat Ýazweliýewiň 18 gektar kärende ýerinde şol kombaýnlaryň ençemesiniň öndürijilikli işledilýändiginiň şaýady bolduk. Maksat Ýomutbaýew, Kaka Gazakow, Parahat Saparow, Sapar Durdymedow, Baýrammämmet Baýrammämmedow, Wepa Jumageldiýew, Haşym Nejimow ýaly öz işiniň ussatlary erk edýän kuwwatly kombaýnlary bilen her günde hasylyň 17-18 tonnasyny isripsiz ýygnap, şalyçylaryň alkyşyny alýarlar.
— Şu ýyl şalyçy kärendeçilerimiz Nury Nuryýew 50, Töremyrat Öwezow 35, Humaý Noşyýewa 5, Enebaý Hudaýberdiýewa 4 gektar kärende ýerlerinde şalynyň bereketli hasylyny kemala getirdiler. Olaryň her gektardan alan hasyly 60 sentnere golaýlady. Daýhan birleşigimizde şaly hasylyny ýetişdirmekde ýylyň-ýylyna ýokary netijeleri görkezýän şalyçylar başga-da köp. Häzirki günlerde şaly oragy gyzgalaňly dowam edýär. Bu ýyl hem ýetişdirilen hasyly zaýasyz ýygnap, Watan harmanyna mynasyp goşandymyzy goşup, ýurdumyzda giňden bellenilýän Hasyl toýuna özümiziň zähmet sowgatlarymyz bilen bararys — diýip, daýhan birleşiginiň baş agronomy Amannepes Paşşyýew aýtdy.
